теркаца суьре-Старые Чеченские песни

теркаца суьйре ю хаза еъна
жима к1ант хин йисте йо1 ган веъна
безамо шен кийра ц1е латийна
исбаьхьчу аматах лаам хьегош
лаьтта йо1 мела хи б1аьргех 1енош
шен даго хьулдинарг к1антех лечкъош

эсала довха дог доьхна дайна
вист хилир жима к1ант синтем байна
ала йо1 х1ун бала хьоьга кхечна
бала бу сан коьртехь доза доцуш
сан наха хьо везар вита бохуш
сан кхоллар кхечуьнца боцар лоьхуш

тахана саготта ма хьийзалахь х1ай
кхолламе а дай хила хьакх эца вай
ширачу г1иллакхе ма кхийда вай
парг1ате зама ю вайх нах йинарг
харц эшо нийсонан некъ 1аминарг
хьо соьца д1а йола ас леринарг

къоналли ирс толо дешнаш хезна
хьомсарчу безамца дахар дезна
т1етайра жима йо1 б1аьрхиш лекхна
к1ента куьг кхетаза куьг схьа лецна
х1усаме боьду некъ юьхьер лецна
акхтаргийн 1индаг1ехь уьш д1а байра